«Башкы болгаш Дагдыныкчы» чылынга тураскаадып база чоокшулап келген улуг байырлал — «Тыва дыл» хүнүн уткуштур хемчегни Республиканың эмчи колледжиниң сургуулдарынга эрттирген.
2016 чылда Тываның улустуң чогаалчызы А.А. Даржайның Тываның Чазаанга тыва дыл хүнүн доктаадыр дугайында идип үндүрген саналын Республиканың Чазак даргазы Ш.В.Кара-оол деткип, ноябрь 1-ниң хүнүн – «Тыва дыл» хүнү кылдыр хоойлужудуп чарлаан болганда, бүгү тыва чонга улуг байырлал. Октябрь 30-де байырлалга тураскааткан солун ужуражылга
Республиканың эмчи колледжиниң бирги курстуң сургуулдарынга эрткен.
Төрээн дылды, чогаалды өөредилге черлеринге делгередип сайзырадырынга база башкылаарынче угланган ажылдарга улуг үлүг хуузун киирип чоруур, Тывада билдингир башкы, шүлүкчү Лидия Ооржак-биле ужуражылга сургуулдарга-даа, башкыларга-даа солун, ажыктыг болган.
Л.Х.Ооржак сургуулдарга төрээн дылын билириниң, ону келир салгалдарга арттырарының чугулазын амыдыралчы чижектерге болгаш чогаалдарга даянып чедингири-биле таныштырган.
Башкы болгаш сургуулдарның аразынга ажык чугаа ала-чайгаар тургустунуп, бөгүнгү амыдыралда чидиг айтырыгларны сайгарып чугаалашканнар.
Эмчи мергежил дээрге эң-не буянныг мергежил, ол кижилерниң чүгле аарыын эмнээрден аңгыда сагыш-сеткилин база эмнээр, амыдыралынга ынак, чүткүлдүг болурунга идиг бээрин башкы бөдүүнү-биле чугаалап берип турган.
Сургуулдар келген аалчыга өөрүп четтиргенин илередип, байырлал уткуштур бүгүдеге экини күзээннер.Ужуражылганың түңнелинде колледжтиң башкылары ужуражылга оларның башкы ажылынга онзагай медээлерлиг, методиктиг дузалыг болганын база демдеглээннер.
