«Аныяк шүлүкчү» мөөрейин Өг-бүле чылынга болгаш тыва дыл хунуге тураскаадып эрттирген. Бир дугаар эртип турар мөөрейге ниитизи-биле 7 сургуул киришкен. Ол дээге 1 курс 6 болук база 2 курс 7 болуктун сургуулдары. Киржикчилерниң ажылдарын үнелеп көргеш, дараазында түңнелдерни үндүрген.
Бирги черни 1 курс 6 болуктун сургуулу Калзан Аялга тиилеп алган. Ийиги шаңналдыг черге база-ла ол болуктун сургуулу Чонгоо Сайын төлептиг болган. Үшкү черни 2 курстун 7 болуктун сургуулу Ооржак Доржу ээлээн.
Коллдеж чергелиг «Аныяк шүлүкчү» мөөрейниң бүгү киржикчилеринге болгаш тиилекчилеринге байыр чедирбишаан, моон-даа соңгаар чогаадыкчы чедиишкиннерни сеткиливис ханызындан күзедивис! База ол ышкаш тиилекчинин шулуктерин силерге бараалгаттывыс.
*Өг-буле — өндүр ыдык чөленгииш*
Өг-бүле-өндүр ыдык чөлеңгииш-тир.
Өг-бүле-өлчей чаштың ыызы долган,
Ажы-төлдүң өөрүшкүзү ында сиңген,
Аймак төөгүң арбан долган кежииң ол-дур.
Сыннар эдээ эмзиг, оъттуг Тывавыста,
Салгал дамчаан, өгбелерим өөрүшкүм ол.
Бөөдей өгде ие кижи кады чорда,
Бодаралдың эн-не быжыг дөзү ол-дур.
Аймак-угум үзүлбейин уламчылаан,
Аал-чуртум өнчү-байлаа улай дамчаан.
Алдар-аттыг өгбелерниң чагыын алган,
Аас-кежик айызап каан кежиим ол-дур.
Ада-ие уктаан оруун изей баскан,
Ажы-төлү бистер дыр бис, көрүңер даан.
Аал долдур ажы-төлүн кижизиткен,
Ада-ие чуртталгазы бистер-дыр бис.
Аялга К.
**Ыдыктыг чер «Чаламамга»*
Арыг агаар, салгын-сырын, меңги бөрттуг,
Хаттыг-Тайга, Хаан-Дагның ортузунда,
Чайлаглыг чер оруктарын эртип ора,
«Чалама» деп ондур ыдык черивис бар.
Сеткил-сагыш дүвүрээнде оожуургадыр,
Сеткилинден арыгланып, айдызаныр.
Чойган, пөштер, чечек-чимис шыва үнген,
Чараш, бедик ыдыктыг чер Чаламамны.
Хой-ле санныг сүме дилеп келген чонну,
Хулээп алыр бойдус чаяан Чалама.
Чедип барып сүзүглээрим кайгамчык чер,
Чер-ле онза хаялыг даш Чаламамны.
Черим-чуртум бойдузунга ынак болуп,
Чер-ле шупту кадагалап, карактаалы,
Келир өйде салгалдарга чижек болуп,
Кежиивисти өнчү
кылдыр артыраалы!
Аялга К.
